Киров    +7-912-710-08-40

молебен о даровании чад

молебен о даровании чад

Последование молебна о даровании чад

 

Благословен Бог наш…

Царю Небесный. Трисвятое по Отче наш. Господи помилуй (12 раз). Слава и ныне… Придите, поклонимся…

Псалом 50-й.

 

На Бог Господь тропари:

Тропарь, глас 2: Творче и Создателю всяческих, / Боже, дела рук наших, ко славе Твоей начинаемая, / Твоим благословением спешно исправи, / и нас от всякаго зла избави, // яко един Всесилен, и Человеколюбец.

Тропарь, глас 2: Скорый в заступление и крепкий в помощь, / предстани благодатию силы Твоея ныне / и благословив укрепи, / и в совершение намерения благаго дела рабов Твоих произведи. / Вся бо, елика хощеши, // яко всесильный Бог, творити можеши.

Кондак Феодоровской иконе Божией Матери, глас 8

Притецем, людие, вси к тихому и доброму пристанищу, / в дом Божия Матере, чудному образу Царицы и Богородицы, / за неизреченную милость Ея явленному, / верно припадающе и вопиюще: / о Всемилостивая Владычице, за спасительное Твое смотрение, / чуднаго образа к нам пришествие, посети нас, грешных, / светло сотворяющих празднество Твое, / укрепи страну нашу, дивно на враги победу подающи, / и веру утверди. Церковь Сына Твоего непоколебиму соблюди, / притекающих к Тебе спаси, от всяких напастей избави, / сохраняющи в мире все Православие, да зовем Ти: // радуйся, Невесто Неневестная.

 

Тропарь Симеону, Мироточивому, глас 3:
Божественною благодатию просветився, / и по смерти показуеши светлость жития твоего, / источаеши бо миро благоухания / притекающим к раце мощей твоих, / и люди твоя наставил еси к свету Богоразумия, / Симеоне отче наш, / Христа Бога моли / даровати нам велию милость.

 

Кондак, глас 6:    Ангельское возлюбив на земли житие, миродержание и мир оставив, пощением Христу, Симеоне, последовал еси, к Немуже, любящих тя апостольски наставил еси, вопия: возлюбите Бога, якоже Он возлюбил нас.

Слава, ин кондак, глас 2:

Иго Христово прием, Симеоне, и, Того крест взем, последовал Ему, насажден в дому Господнем, процвете, яко финикс, якоже кедр, иже в Ливане, умножил еси чада твоя, муж желаний духовных, чудотворец бо явися, Христа Бога моли непрестанно о всех нас.

И ныне, глас той же:

Предстательство христиан непостыдное, / ходатайство ко Творцу непреложное, / не презри грешных молений гласы: / но предвари, яко Благая, на помощь нас верно зовущих Ти: / ускори на молитву и потщися на умоление, // предстательствующи присно, Богородице, чтущих Тя.

Запевы ( 3 раза):

Слава Тебе, Боже наш… , Пресвятая Богородице… Преподобный отче Симеоне… Слава Отцу и Сыну и Святому Духу…

Избави…, Спаси…

Моли Бога о нас, преподобный отче наш Симеоне…

 

Прокимен, глас 4-йБуди светлость Господа Бога нашего на нас, и дела рук наших исправи.

Стих: И призри на рабы твоя и на дела твоя.

(К Филипписием 2:12-16)

Братие, якоже всегда послушасте мене, не якоже в пришествии моем точию, но ныне много паче во отшествии моем, со страхом и трепетом свое спасение содевайте. Бог бо есть действуяй в вас и еже хотети и еже деяти о благоволении. Вся творите без роптания и размышления, да будете неповинни и цели, чада Божия непорочна посреде рода строптива и развращена, в нихже являетеся якоже светила в мире. Слово животно придержаще, в похвалу мне в день Христов.

 

Евангелие от Матфея (гл. 7, ст. 7—11):

 

Рече Господь: Просите, и дастся вам: ищите, и обрящете: толцыте, и отверзется вам: Всяк бо просяй приемлет, и ищяй обретает, и толкущему отверзется. Или кто есть от вас человек, егоже аще воспросит сын его хлеба, еда камень подаст ему? Или аще рыбы просит, еда змию подаст ему? Аще убо вы, лукави суще, умеете даяния блага даяти чадом вашым, кольми паче Отец ваш небесный даст блага просящым у него.

Запевы ( 3 раза):

Слава Тебе, Боже наш… , Пресвятая Богородице… Преподобный отче Симеоне… Слава Отцу и Сыну и Святому Духу…

 

Ектения:

Помилуй нас, Боже…

Еще молимся о Великом Господине…

Еще молимся о богохранимей…

-Еще молимся Тебе, Господу Богу нашему, еже услышатися гласу моления нашего и молитве, и помиловати рабов Твоихимярек: благодатию и щедротами Твоими, и исполнити вся прошения их, и простити им вся согрешения вольная и невольная, благоприятным же быти мольбам и милостыням их пред престолом Владычествия Твоего, и покрыти их от всех враг видимых и невидимых, от всякия напасти, беды и скорби, и недугов избавити, и подати здравие с долгоденствием: рцем вси: Господи, услыши и помилуй.

-Призри, Владыко Человеколюбче, милостивным Ти оком на рабов Твоих имярек: и услыши моления наша, с верою приносимая, яко Сам рекл еси: вся елика молящееся просите, веруйте яко примите, и будет вам, и паки: просите и дастся вам. Сего же ради и мы, аще и недостойнии, уповающее на милость Твою, просим: подаждь благость Твою рабом Твоимимярек: и исполни благая желания их , мирно же и тихо в здравии и долгоденствии вся дни их соблюди: рцем вси: скоро услыши и милостивно помилуй.

-Якоже ныне, милостивно услышал еси молитвы рабов Твоих, Господи, и явил еси на них благоутробие человеколюбия Твоего, сице и в предняя не презирая, исполни во славу Твою вся благая хотения верных Твоих, и яви всем нам богатую милость Твою, вся нам согрешения презирая: молимся Ти, услыши и помилуй.

— Во славу твою вся творити повелевая, Господи, рабом твоим имярек, ко твоей славе дело свое начинающым, благословением твоим поспешество благополучное с довольством к совершению подаждь, молимтися, вседаровитый Творче, услыши и помилуй.

-Еще молимся и о еже услышати Господу Богу моление нас грешных и помиловати нас.

Яко милостив…

Господу помолимся.

Господи помилуй.

Услыши ны, Милосердый и Всемогущий Боже, и услышав моление наше, низпосли благодать Твою. Буди милостив, Господи, к молитве нашей, помяни заповедь Твою об умножении рода человеческаго, и буди милостивым Покровителем, да Твоею помощию исполнится Твое установление. Ты властною силою Твоею вся сотворил из ничего, и положил начало всему сущему в мiре, сотворил и человека по образу Твоему, и союз супружества мужа и жены благословил и освятил еси. Призри, Милосердый Боже, на рабов Твоих сих имярек: союзом супружеским соединенных и умоляющих о Твоей помощи, да будет на них милость Твоя, да будут плодовиты, и да увидят они чада чад своих даже до третьяго и четвертаго рода, и до старости благой достигнут, и внидут в Царство Твое Небесное силою Господа нашего Иисуса Христа, Ему же подобает всякая слава, честь и поклонение со Отцем и Святым Духом во веки. Аминь.

 

Молитва Пресвятой Богородице перед Ее иконой «Феодоровская»

Ко Пресвятей Владычице… 

 

К кому воззову, Владычице, к кому прибегну в печали моей; к кому принесу слезы и воздыхания моя, аще не к Тебе, Царице Небеси и земли: кто исторгнет мя от тины грехов и беззаконий, аще не Ты, о Мати Живота, Заступнице и Прибежище рода человеческаго. Услыши стенание мое, утеши мя и помилуй в горести моей, защити в бедах и напастях, избави от озлоблений и скорбей, и всяких недугов, и болезней, от враг видимых и невидимых, умири вражду стужающих мне, да избавлен буду от клеветы и злобы человеческия; такожде от своея ми плоти гнусных обычаев свободи мя. Укрый мя под сению милости Твоея, да обрящу покой и радость и от грехов очищение. Твоему Матернему заступлению себе вручаю; буди мне Мати и надеждо, покров, и помощь, и заступление, радость и утешение, и скорая во всем Помощнице. О, чудная Владычице! Всяк притекает к Тебе, без Твоея всесильныя помощи не отходит; сего ради и мы недостойнии к Тебе прибегаем, да избавлени будем от внезапныя и лютыя смерти, скрежета зубнаго и вечнаго мучения. Небесное же Царствие и Дар чадородия получити сподобимся и Тебе во умилении сердца речем: Радуйся, Мати Божия, Предстательница и Заступница наша усердная, во веки веков. Аминь.

 

Величание 

Премудрость…

 

Поделиться