Киров    +7-912-710-08-40

МОЛЕБЕН ПОКАЯННЫЙ ко Господу Богу, Пресвятой Владычице Богородице и святым мученикам 14 тысячам младенцам Христа ради в Вифлееме от Ирода избиенным. (о прощении греха детоубийства)

МОЛЕБЕН ПОКАЯННЫЙ ко Господу Богу, Пресвятой Владычице Богородице и святым мученикам 14 тысячам младенцам Христа ради в Вифлееме от Ирода избиенным. (о прощении греха детоубийства)

МОЛЕБЕН ПОКАЯННЫЙ
ко Господу Богу,
Пресвятой Владычице Богородице и
святым мученикам 14 тысячам младенцам
Христа ради в Вифлееме от Ирода избиенным.
(о прощении греха детоубийства)

Текст молебна. сыыка для печати: http://abortamnet.ru/download/moleben-pokayannyi.pdf

ПОСЛЕДОВАНИЕ МОЛЕБНА
Иерей: Благословен Бог наш: Лик (чтец): Аминь. Царю небесный:
Трисвятое по Отче наш: Господи, помилуй, (12)
Слава и ныне:
Приидите, поклонимся, Цареви нашему Богу.
Приидите, поклонимся и припадем Христу, Цареви нашему Богу.
Приидите, поклонимся и припадем самому Христу, Цареви и Богу нашему.
Псалом 50:
Помилуй мя Боже, по велицей милости Твоей, и по множеству щедрот
Твоих очисти беззаконие мое. Наипаче омый мя от беззакония моего, и от
греха моего очисти мя; яко беззаконие мое аз знаю, и грех мой предо мною
есть выну. Тебе единому согреших и лукавое пред Тобою сотворих; яко да
оправдишися во словесех Твоих, и победиши внегда судити Ти. Се бо в
беззакониих зачат есьм, и во гресех роди мя мати моя. Се бо истину
возлюбил еси, безвестная и тайная премудрости Твоея явил ми еси,
окропиши мя иссопом, и очищуся; омыеши мя, и паче снега убелюся, Слуху
моему даси радость и веселие; возрадуются кости смиренныя. Отврати лице
Твое от грех моих и вся беззакония моя очисти. Сердце чисто созижди во мне,
Боже, и и дух прав обнови во утробе моей. Не отвержи мене от лица Твоего, и
Духа Твоего Святаго не отъими от мене. Воздаждь ми радость спасения
Твоего, и Духом Владычным утверди мя. Научу беззаконныя путем Твоим, и
нечестивии к Тебе обратятся. Избави мя от кровей, Боже, Боже спасения
моего: возрадуется язык мой правде Твоей. Господи, устне мои отверзеши и
уста моя возвестят хвалу Твою. Яко аще бы восхотел еси жертвы, дал бых
убо: всесожжения не благоволиши. Жертва Богу дух сокрушен; сердце
сокрушенно и смиренно Бог не уничижит. Ублажи, Господи, благоволением
Твоим Сиона, и да созиждутся стены иерусалимския: тогда благоволиши
жертву правды, возношение и всесожигаемая: тогда возложат на олтарь Твой
тельцы.
Слава, и ныне:
Аллилуия, трижды
Глас 4: Бог Господь, и явися нам, благословен Грядый во имя Господне:
Таже тропарь, глас 4:
Иисусу родшуся в Вифлееме Иудейстем,/ Иудейская держава упразднися./
Да играют младенцы, за Христа закалаеми,/ Иудея да рыдает:/ глас бо
слышан бысть в Раме,/ Рахиль, плачущи, рыдает по чадех своих,/ младенцы
бо избив,Ирод пребеззаконный/ Иудею насыщая неповинныя крове;/ и земля
убо червленяшеся кровьми младенцев,/ от язык же Церковь таинственне
очищается/ и в красоту одеяется./ Прииде Истина,/ Бог явися в сени
седящим,/ от Девы родивыйся, во еже спасти нас.
Слава и ныне:
К Богородице прилежно ныне притецем,/ грешнии и смиреннии, и припадем,/
в покаянии зовущи из глубины души:/ Владычице, помози, на ны
милосердовавши;/ потщися, погибаем от множества прегрешений;/ не отврати
Твоя рабы тщи:/ Тя бо и едину надежду имамы. КАНОН ПОКАЯННЫЙ. Глас 6:
Песнь 1.
Ирмос: Яко по суху пешешествовав Израиль,/по бездне стопами,/
гонителя фараона/ видя потопляема,/ Богу/ победную песнь поим вопияше.
. Припев: Помилуй мя, Боже, помилуй мя.
Како отверзу уста моя нечистыя, како начну плакатися беззаконных моих
деяний, Агнче Божий, Вземляй грехи мира, услыши стенание мое и скорби
сердца моего вонми, возьми мое тяжкое бремя греховное; Понесый немощи
наша, приими в покаянии припадающих к Тебе.
Помилуй мя, Боже, помилуй мя.
О, горе мне грешному! Паче всех человек окаянен есмь: покаяния несть во
мне; даждь ми, Господи, слезы, да плачуся дел моих горько.
Пресвятая Богородице, спаси нас.
Мати Божия Пречистая, воззри на мя грешного, и сети диаволи избави мя, и
на путь покаяния настави мя, да плачуся дел моих горько.
Святие мученицы Вифлеемския, молите Бого о нас.
Чертог брачный отверзеся днесь младенцам убиенным за Христа и Бога,
врагов побеждая начала и власти, и Иродов обличая безумный гнев
смысленно.
Слава и ныне.

Песнь 3.
Ирмос: Несть свят, якоже Ты, Господи Боже мой, вознесый рог верных
твоих, Блаже, и утвердивый нас на камени исповедания Твоего.
Помилуй мя, Боже, помилуй мя.
Глаголы жизни Твоея презрех, Господи, и по воли сердца моего ходих от
юности моея даже до сего дне, и яко Ирод беззаконный в ослеплении гордыни
и обольщении бесовском пребывая, убивал детей своих неродившихся. О,
горе мне грешному!
Помилуй мя, Боже, помилуй мя.
Внегда поставлени будут престоли на судище страшнем, тогда всех человек
дела обличатся: горе тамо будет грешным, в муку отсылаемым: и то ведущи,
душе моя, покайся от злых дел твоих.
Пресвятая Богородице, спаси нас.
Се, взывает, Госпоже, Сын Твой, и поучает нас на доброе, аз же грешный
добра всегда бегаю: но Ты, Милостивая, помилуй мя, да покаюся от злых дел
моих.
Святии мученицы Вифлеемския, молите Бога о нас.
Страдальцы дети — сверсницы Христова воплощения, Иродово неразумное
ослепиша неистовство и очи всесветлии Церкви явишася.
Слава и ныне.
Таже:
Избави от бед рабы Твоя, Многомилостиве,/ яко мы усердно к Тебе
прибегаем,/ милостивому Избавителю, всех Владыце, Господу Иисусу. Спаси от бед рабы Твоя, Богородице,/ яко вси по Бозе к тебе прибегаем,/
яко к Нерушимей Стене и Предстательству.
Призри благосердием, Всепетая Богородице,/ на мое лютое телесе
озлобление,/ и исцели души моея болезнь.
Молите Бога о нас, святии мученицы Вифлеемския,/ яко мы усердно к вам
прибегаем,/ скорым помошникам и молитвенникам о душах наших.

Песнь 4.
Ирмос: Христос моя сила, Бог и Господь, честная Церковь боголепно
поет, взывающи от смысла чиста о Господе празднующи.
Помилуй мя, Боже, помилуй мя.
Владыко мой и Творче, Ты заповедал еси чрез Моисея закон Твой, аз же,
скверный, презрех заповеди Твоя, предахся плотским сластем, попечение о
плоти извратив в похоти; им служил, яко раб купленный, забыв день Суда и
праведного воздаяния Твоего.
Помилуй мя, Боже, помилуй мя.
Широк путь зде и угодный сласти творити, но горько будет в последний
день, егда душа от тела разлучатися будет: блюдися от сих, человече,
Царствия ради Божия.
Пресвятая Богородице, спаси нас.
Госпоже Богородице, помилуй мя грешного, и в добродетели укрепи, и
соблюди мя, да наглая смерть не похитит мя неготоваго, и доведи мя, Дево,
Царствия Божия.
Святии мученицы Вифлеемския, молите Бога о нас.
Младенец множество мученически, по Бозе все пострадавше, почести
горнего звания от Него приемлют: их же ради Ирод беззаконным вменися.
Слава и ныне.

Песнь 5.
Ирмос: Божиим светом Твоим, Блаже, утренюющих Ти души любовию
озари, молюся: Тя ведети, Слове Божий, истиннаго Бога, от мрака
греховного взывающа.
Помилуй мя, Боже, помилуй мя.
Жизни Подателю, веков Творче, Царю мой и Боже мой, за многая Твоя
блага воздах Тебе злом, окаянный; отвергох пренебесный дар жизни,
посланных от Тебе деток погубих, и душу мою во тьму ада предах, но многия
скорби и болезни по делом разбойничим приемля во смирении молю: помяни
мя, Господи, во Царствии Твоем.
Помилуй мя, Боже, помилуй мя.
Блудника и разбойника кающася приял еси, Спасе: аз же един леностию
греховною отягчихся, и злым делом поработихся: душе моя грешная, сего ли
восхотела еси.
Пресвятая Богородице, спаси нас.
Дивная и скорая Помошнице всем человеком, Мати Божия, помози мне
недостойному, душа бо моя грешная сего восхоте.Святии мученицы Вифлеемския, молите Бога о нас.
Скверноубийства кровьми Ирод оскверняется: Владыку бо всех, Бога и Царя
убити покушаяся, на отроки неистовствует и свирепствует люте.
Слава и ныне.

Песнь 6.
Ирмос: Житейское море воздвизаемое зря напастей бурею, к тихому
пристанищу Твоему притек, вопию Ти: возведи от тли живот мой,
Многомилостиве.
Помилуй мя, Боже, помилуй мя.
Заблудих яко овча погибшее, омрачихся умом в житейских страстех, не могу
воззрети к Тебе в болезни, не могу согретися слезами, яже к Тебе любве; но
Ты, Владыко, яко Пастырь добрый не остави мене погибающа, даруй мне
покаяние всецелое, осияй мя милостию Твоею, и очисти душу от безмерной
тяжести греха детоубийства.
Помилуй мя, Боже, помилуй мя.
Воспряни, окаянный человече, к Богу, воспомянув своя согрешения,
припадая ко Творцу, слезя и стеня, Тойже яко милосерд, даст ти ум, знати
волю Свою.
Пресвятая Богородице, спаси нас.
Богородице Дево, от видимаго и невидимаго зла сохрани мя, Пречистая, и
приими молитвы моя, и донеси я Сыну Твоему, да даст ми ум творити волю
Свою.
Святии мученицы Вифлеемския, молите Бога о нас.
Рахиль, убо чад плачущи, древле провозвести за Христа младенцев,
приемших безгодное заколение: Увы мне, вопиет, утешитися не хотящи.
Слава и ныне.
Кондак, глас 6:
Душе моя, душе моя, восстани, что спиши; конец приближается, и имаши
смутитися: воспряни убо, да пощадит тя Христос Бог, везде Сый и вся
Исполняяй.
Священник: Паки и паки миром Господу помолимся:
По возгласе: Вонмем, Премудрость, вонмем.
Прокимен, глас 6: Хвалите, отроцы, Господа, хвалите имя Господне.
Стих: Вселяя неплодовь в дом, матерь, о чадех веселящуся.
Премудрость.
Апостол: Рим. зач. 93

Аллилуия, глас 5: Пролияша кровь их, яко воду.
Евангелие: Матф, зач. 4
По евангелии, стихира, глас 1: Пречистому Твоему Рождеству, Христе Боже, первая жертва бысть
младенцы: Ирод бо яти Тя, неятого, восхотев, не позна, мученический
приводя Тебе лик. Тем же Тя молим, вочеловечшагося, спасти души наша.
Слава и ныне, глас 6:
Не имамы иныя помощи, не имамы иныя надежды, разве Тебе, Владычице,
Ты нам помози, на Тебе надеемся, и Тобою хвалимся: Твои бо есмы раби, да
не постыдимся.

Песнь 7.
Ирмос: Росодательну убо пещь содела ангел преподобным отроком,
халдеи же опаляющее веление Божие, мучителя увеща вопити: благословен
еси, Боже отец наших.
Помилуй мя, Боже, помилуй мя.
Хищницы, убийцы, тати и вси нераскаяннии грешницы Царствия Божия не
наследуют; аз же всякою неправдою и мерзкими грехми оскверних тело и
душу мою; таковаго ради бедствия моего, из рова погибели на Тебе, Владыко
мой, взирающе, зову:
Помилуй мя, Боже, помилуй мя.
Уязвихся прелестию мира сего и приклоних колена пред ним, избравши
пагубный путь мерзкаго закона его, забывши обеты Крещения, и ,
опускающеся по степенем преступлений, яже лукаво предложи мне мир, аз
достигох самыя глубины смертных грехов — чадоубийства; но Объятия Твоя,
Отче, отверзи мне человеколюбно, да понеже до конца дней моих приношу Ти
жертву чисту — сердце мое, покаянием сокрушенное.
Пресвятая Богородице, спаси нас.
Богородице, Надеждо и Предстательство Тебе поющих, возьми бремя от
мене тяжкое греховное, и яко Владычица Чистая, кающася приими мя.
Святии мученицы Вифлеемския, молите Бога о нас.
Незлобива жертва и нескверная за Тебя предзакалается, Божий Слове,
вопиюще: благословен еси, Господи, Боже отец наших.
Слава и ныне.
Песнь 8.
Ирмос: Из пламени преподобным росу источил еси, и праведнаго жертву
водою попалил еси: вся бо твориши, Христе, токмо еже хотети. Тя
превозносим во вся веки.
Помилуй мя, Боже, помилуй мя.
Юность моя пройде в безумии, все житие мое иждих во гресех, в лености и
нерадении, но старость моя ужасом неминуемого Суда Твоего приведе мя к
покаянию; не отрини мене, Спасе мой, во единонадесятый час к Тебе
пришедшаго, и к Милосердию Твоему взывающаго:
Помилуй мя, Боже, помилуй мя.
Верую, яко приидеши судити живых и мертвых, и вси в своем чину станут,
старии и младии, владыки и князи, девы и священницы: где обрящуся аз; сего
ради вопию: даждь ми, Господи, прежде конца покаяние.
Пресвятая Богородице, спаси нас. В жизни земной превеликия скорби претерпела еси, Пречистая Дево,
смиренно принявши от Творца неизъяснимое послушание материнства, аз же,
раб неключимый, на что променял посылаемое родительство? Чесо ради
сгубил деток невинных? Адская утроба алчет мя сквернаго, но Ты, Мати
Пресвятая, покрый милосердием Твоим безумное мое окаянство, испроси у
Сына Твоего прощение лютых моих, и в день Страшного Суда
засвидетельствуй сердечное раскаяние мое.
Святии мученицы Вифлеемския, молите Бога о нас.
Множество неискусозлобное воинствует Владыце днесь кровию и на Ирода
твердо вооружается, Тебе, Христе, родшуся; темже вопием, воспевающее:
благословите вся дела Господня, Господа.
Слава и ныне.
Песнь 9.
Ирмос: Бога человеком невозможно видети, на негоже не смеют чини
ангельстии взирати: Тобою же, Всечистая, явися человеком Слово
воплощенно: Егоже величающе, с небесными вои Тя ублажаем.
Помилуй мя, Боже, помилуй мя.
Совокупи убо Давид иногда беззаконию беззаконие: убийству же
любодейство растворив, покаяние сугубое показа абие: аз же, окаянный, во
многия убийства впав, ни капли слез имею от жестосердия, но к Твоему
Благоутробию припадающе, яко Давид вопию:
Помилуй мя, Боже, помилуй мя.
Преблагий Боже, призри с высоты Святыя Твоея на землю нашу Русскую и
силою Твоею сокруши и разори жертву беззаконную, народом нашим сатане
приносимую, благодатию Твоею преобрази греховное естество наше, дух
прав обнови в народе моем, не отвержи нас от лица Твоего, и Духа Твоего
Святаго не отими от земли Русской, да в покаянии зовем:
Помилуй нас, Боже, помилуй нас.
Предстательство христиан непостыдное, Ходатайство ко Творцу
непреложное, не презри грешных молений гласы, но предвари, яко Благая, на
помощь нас, верно зовущих Ти: ускори на молитву и потщися на умоление,
предстательствующи присно, Богородице, чтущих Тя.
Пресвятая Богородице, спаси нас.
Поем Тя, благословим Тя, поклоняемся Тебе, Богородительнице, яко
Нераздельныя Троицы породила еси Единаго, Христа Бога, и Сама отверзла
еси нам сущим на земли небесная.
Святии мученицы Вифлеемския, молите Бога о нас.
Мерзко Иродово детоубийство и чиста детей жертва, яко сверстных Христу
нашего Спасения, не плачи, Рахиль, чад, поминающи недра Авраамова,
идеже всех есть веселящихся жилище.
Слава и ныне.
Таже: Достойно есть;
Ектения сугубая: Помилуй нас, Боже:
По возгласе: Ко Господу, со умилением сердец, колена преклоньше,
помолимся: Лик: Господи, помилуй, трижды.
Иерей чтет молитву:
Господи, Иисусе Христе, Сыне Божий, Источниче жизни и безсмертия,
пришедый в мир грешныя спасти. Нас ради человек и нашего ради спасения
вочеловечившийся, и родитися изволивый от Приснодевы Марии, злобу мира
людскаго от младых лет изведевый, и мученичество младенцев
Вифлеемских, за Тебя умерщвленных, благословивый, и кровь их неповинную
явивый основанием Церкви святых; Сам убо, Господи, Спасителю наш,
призри на нас грешных и недостойных рабов Твоих, выю сердца и телесе
пред величеством славы Твоея приклонивших.
Согрешихом, беззаконновахом, неправдовахом пред Тобою, но не яростию
Твоею обличиши нас, ниже гневом Твоим накажеши нас. Тебе единому
согрешихом, но Тебе единому и поклоняемся и сокрушенным сердцем, яко
жертву чистую, исповедание Тебе приносим:
Прости, Благоутробне Господи, нас, возлюбивших страсти более закона
Твоего, поправших заповеди Твоя, и в безумии убивавших детей своих
неродившихся, других к сему смертному греху подвигавших, или преступному
их намерению не возбранивших.
Вемы, яко достойны есмы огня геенскаго и вечныя муки, но к безмерному
Человеколюбию Твоему взываем, Господи; призри на искреннее раскаяние
наше, приими сердце сокрушенное безмерной тяжестию содеянного, да
победит множество щедрот Твоих грехов наших лукавое соборище. Имамы,
Господи, Человеколюбия Твоего образ: разбойника, мытаря, блудницу,
блуднаго сына, иже вси паче нас в покаянии благоискуствующе, в Небесное
Царство предвзыдоша. С ними же убо и ны, исповедающеся и припадающе
Ти, приими, Владыко.
Избави нас от належащего и праведного Своего прещения, губительства,
труса, потопа, огня, меча, нашествия иноплеменных и междоусобныя брани, и
от всякия смертоносныя язвы.
Призри, Всесильне Господи, на землю нашу Русскую и на люди Твоя:
вразуми творящих беззакония, возсияй Истиною Твоею в сердцах заблудших
и во тьме пребывающих братьев, сестер и чад наших; просвети разум
матерей, приносящих своих не родившихся детей в жертву беззаконную
дьяволу, останови руку врача-детоубийцы, всесильною Десницею Твоею
пресеки Иродово кровавое беззаконие, на земли нашей творимое.
Многомилостиве и Долготерпеливе Господи, Иисусе Христе, Боже наш, не
хотяй смерти грешников, даруй и нам время на покаяние, яко да и настоящих
зол, и будущих вечных мук свободимся, молитвами святых мучеников
младенцев Вифлеемских, ходатайством Пресвятой Владычицы нашей
Богородицы, благодатию и человеколюбием Безначального Твоего Отца, с
Ним же благословен еси, со Пресвятым, Благим и Животворящим Твоим
Духом, ныне и присно и во веки веков. Аминь.
Премудрость: Пресвятая Богородице, спаси нас:
Отпуст.
Величание: Величаем, величаем вас святии мученицы Вифлеемския, и чтим честная
страдания ваша, яже за Христа претерпели есте.
Сие последование составлено ради насущной необходимости совершения
по церквам земли Русской покаянных соборных молебствий о прощении
затопившего страну греха детоубийства.
Молебен составлен на основании следующих источников:
1. ТРЕБНИК в двух частях. Издательский отдел Московского Патриархата.
2. КАНОННИК или полный молитвослов. Издательский отдел Московского
Патриархата. 1994г. (стр.161-169)
3. КАНОН ВЕЛИКИЙ прп. Андрея Критского. Изд. «Христианская жизнь» , г.
Клин, 2007г.
4. СЛУЖБА ВИФЛЕЕМСКИМ МЛАДЕНЦАМ прп. Андрея Критского. МПЦ
«Жизнь», г. Москва, 2000г.
5. АКАФИСТ ПОКАЯННЫЙ жен, загубивших младенцев во утробе своей.
Изд. «Благовестник», г. Саратов, 2002г.
6. МОЛИТВЫ, ЧТОМЫЕ НА МОЛЕБНАХ. Издательский отдел Московского
Патриархата.

http://abortamnet.ru/download/moleben-pokayannyi.pdf

Поделиться